Чек арадагы чыр кечээ Баткендин Лейлек районунун Максат айылындагы кыргыз-тажик чек арасына жакын жерде катталган.
Тажикстандын жарандары Баткендин Лейлек районунун Максат айылында кыргыз-тажик чек арасындагы такталбаган жерге тосмо курган. Мындай билдирүүнү УКМКнын Чек ара кызматы билдирди.
Окуя аталган аймактагы «Футбол талаасы» деп аталган такталбаган участкада болжол менен 18:30дарда катталган. Анда Тажикстандын Овчи-Калача айылынын тургундары өз алдынча тосмо тургузушкан.
«Буга байланыштуу Кыргызстан менен Тажикстандын Чек ара кызматтарынын өкүлдөрү тез арада сүйлөшүүлөрдү жүргүзүп, курулушту токтоткон», — деп айтылат Чек ара кызматынын билдирүүсүндө.
Азыркы тапта аймакта абал туруктуу деп сыпатталууда. Чек ара кызматы кырдаалды көзөмөлдөп жатат.
Спутник.kg
